Euskara eta euskal kultura sustatzea helburu duen elkartea

Larunbateko zumba maratoi solidariorako txartelak salgai

By on 2018-10-23 in Aisia, Jendartea, Kirola

Zuetako askok ezagutuko duzue ondoko argazkiko herritarra; Betisa Carrasco. Usurbilen bat baino gehiago jarri du azken urteotan, dantza batean Oiardo Kiroldegian eskaintzen dituen zumba klaseekin. Urriaren 27rako saio berezia antolatu du, maratoi solidarioa denontzat.

Hitzordu honi begira salgai jarriko dituen sarreretatik bildutako diruarekin alaba lagundu nahi du. Joan den udaberrian alaba txikiari diabetesa detektatu zioten. Ordutik, “gau oso bat lo egin gabe daramat”. Goizaldean iratzargailua hirutan jartzen duela aipatu digu. Kontua da, diabetesarekin, gorabehera handiak izaten ditu azukrearekin. “Igoerek ez digute hainbeste kezkatzen, ez baitute beheraldiek bezainbestekoeragina”, adierazi dio NOAUA!ri Betisak. Igoerak dituztenean pixa egiteko gogoa edo egarri handia izaten dute. Beheraldiak dituztenean, “zorabioak eta hotzikarak”.

Alabari diabetesa detektatu ziotenean sarean arakatzen hasi zen Betisa. Zaragozan mediku alerta lanak egiten dituzten zakurrak zituen elkarte baten berri jaso zuen. “Haur diabetikoen azukrearen bat-bateko gorabeherak detektatzen dituzte usaimenaren bidez”, azaldu dio NOAUA!ri Carrascok.

Egun, hainbestetan behatzetan ziztatzen aritu behar izan beharrean, sentsore bat jarri diote besoan, makinarekin pasatzeko. “Azukrearen baremoa ematen dio”. Umeak ume diren heinean, askotan besoan duen sentsorea makinan pasatzea ahaztu eta “konturatzen denerako askotan, hotzikarekin izaten da beherakada izan duelako”.

Zaintzaile lanak egiten dituen zakurrak “jakinaraziko lioke, lasaitasuna eman”. Zakur hauetako bat etxera ekarri asmo dute, aipatu Zaragozako elkartearekin eta zenbait familiekin hitz egin eta oso pozik direla jakin ostean. “Lasaitasuna izango da alabarentzat eta guretzat”, adierazi dio NOAUA!-ri Betisak. Haurrari 24 orduetan lagunduko lioke eta guraoei bereziki gau partean. Urte amaierarako etxean izatea espero dute.

Herrikoen laguntza
Bereziki zereginotarako hezitako zakur honek eragingo dizkien gastu nabariei aurre egiten laguntzeko antolatu du Betisak, urriaren 27ko bi orduko zumba saio solidarioa. “Ni bezala, instruktoreak direnak etorriko dira dantzara”. Herriko eragile ezberdinen laguntza jaso du baita. Jardunaldian zehar egingo duten hamar minutuko atsedenaldian, Orbeldi D.T.-ko kideek erakustalditxo txiki bat egingo dute dantza pare batekin. Usurbilgo DYA-k ere lagundu, Hurbilago Elkarteak edari eta frutarekin. Udalak ere bai, egun horretan aurreikusiak zeuden eskubaloi partidak lekuz aldatzen. “Laguntzeko deitu nienean segituan esan zidaten baietz. Babes handia jasotzen ari naiz”, eta eskerrak helarazi nahi dizkie lerrootatik guztiei.

Parte hartu nahi duzuen guztiok sarrera eskuratu behar duzue. Honatx zumba maratoi solidariora eraman beharrekoak. “mallak, kirola egiteko oinetakoak eta dantza egiteko gogoa!”. Dantzara nahiz zumba festa ikustera gerturatu nahi duen guztiarentzat Oiardo Kiroldegiko ateak zabalik izango dira hilaren 27an. Aukera ederra, zumba ezagutzeko. “Kirol jarduera bat da, dantzatuz dibertitzeko. Kirola eta dantza uztartzen ditu. Klaseak ematen ditu baina niretzat ere terapeutikoa da”, adierazi dio NOAUA!ri Betisak.

Telebista bidez ezagutu zuen zumba. Etxekoek urtebetetzetarako oparitu zioten ikastaro bat Madrilen. “Joan eta gustatu. 6 urte daramatzat eta zoriontsu. Zumba dantzatuz jubilatzea espero dut”, adierazi digu Betisak.

Zumba maratoi solidarioa
Eguna: urriak 27, larunbata.
Ordutegia: 17:00-19:00.
Tokia: Oiardo Kiroldegia.
Sarrerak: aurrez salgai Txirristran edota Oiardo Kiroldegian. Egunean bertan Oiardo Kiroldegian.

Harpidetu

Albiste hau atsegin baduzu, harpidetu orain horrelako albiste gehiago jaso ahal izateko.

Iruzkinak itxita daude.

Usurbilgo baserriak
Usurbilgo ondarea
Igo
Cookie-ak erabiltzen ditugu nabigazio esperientzia hobetzeko eta gure zerbitzuak eskaintzeko. Nabigatzen jarraitzen baduzu, ulertuko dugu horien erabilera onartzen duzula.